39 Escalones Films ekoiztetxe eta banatzaileak hartu du Lekarozko zinema estudioen gidaritza, Nasuvinsarekin sinatutako kontratu baten bidez, Midnight Fear Factory proiektua garatzeko. Industria eta Enpresen Trantsizio Ekologiko eta Digitalerako Departamentuak, Nasuvinsak, Nafarroako Ikus-entzunezkoen Klusterrak eta Navarra Film Comission erakundeak lankidetzan garatu dute proiektua. Horien ordezkariek zinema estudioak bisitatu zituzten atzo, Fernando Anbustegi Baztango alkatearekin eta Lander Santamaria zinegotziarekin batera.
Beldurrezko filmak
Ekoiztetxeak generoko sei film sortzea aurreikusi du heldu den urterako. Hurrengo urteetarako, ekoizpena urteko 12 filmetara zabaltzeko asmoa aurreratu dute, produkzio propioen zein koprodukzioen bitartez. Campuseko estudioak grabaketarako bi plato ditu, 740 metro karraturekin guztira, baita kamerinoak eta ikus-entzunezkoen garapenerako bulegoak ere.