Nafarroako Gobernuaren eta Baztango Udalaren arteko hitzarmenaren bidez kudeatzen da Baztango Liburutegi Publikoa, eta hitzarmenaren arabera, udalak langileak kontratatzeko eskumena badu ere, Gobernuari dagokio liburuzaina esleitzea.
Liburutegi publiko bat izaki, eta ez eskola liburutegia, kultura eta aisialdiaren alorrean kokatzen da. Hala ere, jakina da Baztanen ikasle aunitzek erabiltzen dutela liburutegia ikasteko eta behar horri erantzuteko asmoarekin ireki dute zerbitzu murriztua. Hortaz, liburuzain berria izan arte ez da ohiko mailegu zerbitzurik eskainiko eta ezin izanen dira liburuak edota bertzelako materialak kontsultatu.
Udalak azaldu duenez, liburutegira bideratutako aurrekontua zerbitzuaren errefortzurako edo ordezkapenak egiteko da eta, beraz, Nafarroako Gobernuaren esleipenaren zain egonen dira berriz ere ohiko mailegu zerbitzua eskaintzeko.