«Bertze aldietan Baztanen argi utzi da berdintasunak oraindik ere bide luzea duela gure lurraldean. Oraingoan, Amaiurko herrian pasatutako hainbat gertakarirekin garbi gelditu zaigu». Halaxe diote aipatutako eragileek oharrean. Amaiurko bestetan «hainbat eraso» izan direla gaitzetsi dute eta «onartezina» izanda, «lau haizetara zabaltzea» erabaki dute.
Erasoak «geroz eta gazteagoak diren biztanleriaren aldetik» heldu direla azpimarratu dute, eta «bortizkeria horiek kezkagarriak» direla gehitu dute: «Gizartean, geroz eta normalagoak bihurtu dira jokabide sexistak, homofoboak, arrazistak… Eta gazteriak horiek normalizatzeko joera hartu du». Amaiurren gertatutakoaren ondotik, «Baztanen eta gizartean bertze behin ere aldaketaren beharra dagoela» agerian gelditu da sinatzaileen hitzetan.
Bide batez, «baztandar guziei kontzientziarekin jokatzea eta beharrezkoak diren neurriak hartzea» eskatu diete. «Denok dugu zer egina, denon ardura baita».
Oharra «erasotzaileak kanpora» eta «jarrera sexistak ez Amaiurren, ez inon!» mezuekin akitu dute.