Goizean goiz hasiko da jardunaldia, Baztan Bidasoko XX. Ardi Erakusketa eta Lehiaketarekin. 14 artzainek parte hartuko dute lehiaketan eta buru beltz eta gorriko 350 ardi aurkeztuko dituzte guztira. Hiru kategoriatan sarituko dituzte: 6-18 hilabetekoak, 18-36 hilabetekoak eta 36 hilabetetik goitikoak. Gainera, Ardi Gasna Lehiaketa eta artisauen merkatua izanen dira.
Zaldi eta behien erakusketak ere ez du hutsik eginen, trikitilariek alaiturik. Aurizko, Bretainiako eta Comtoise arrazako 80 bat zaldi eta behor egonen dira ikusgai, eta bertze 80 behi Blonda zein Pirinioetakoak.
Egitarauak arratsaldean izanen du segida. 17:00etan artzain zakurren desfilea eginen dute eta 17:30ean XLVIII. Artzain Zakur Txapelketa, aurtengoa Patxi Etxeberriaren XIX. memoriala izanik. Hamaika artzainek parte hartuko dute txapelketan haien zakurrekin:
- Antonio Alustiza eta Txiki (Areso)
- Julen Arburua eta Ipar (Lekaroz)
- Gorka Etxaniz eta Laster (Azkoitia)
- Javier Gaztañaga eta Cool (Antzuola)
- Jon Olivares eta Urdin (Zeanuri)
- Kepa Ardanza eta Urbia (Abadiño)
- Aitor Urien eta Nahi (Abadiño)
- Enrique Mendiguren eta Laia (Orozko)
- Angel Barona eta Jai (Zalla)
- Jean Paul Irikin eta Orai (Itsasu)
- Aitor Aranburu eta Rat (Isturitz)