Baztanen indarkeria matxista desagerrarazteko bidean, udalak Emaztekien Kontrako Indarkeriaren aitzinean Jarduteko I. Koordinazio Protokoloa sinatu zuen joan den urtean. Orain, herritarrei protokoloaren nondik norakoak azaltzeko helburuarekin, aurkezpen saioak antolatu dituzte. Azkena Anizen izanen da, ekainaren 27an 18:30ean.
Saioetan, protokoloa aurkezteaz gain, «edozein indarkeria matxista pairatzen duten emaztekiei, haien familiei eta ingurukoei laguntzeko, eskura dauden tresnak eta foru baliabideak zuzenean ezagutzeko aukera eskainiko da. Guztion parte hartzearekin, haur eta emaztekiendako indarkeria matxistarik eta sexistarik gabeko bizitzak bermatzeko lan egin dezakegu».
Informazio gehiagorako eskuragarri daude gizartezerbitzua@baztan.eus eta berdintasuna@baztan.eus korreoak, baita 689 035 078 eta 613 003 634 telefono zenbakiak ere.