Arizkungo Herriak Zuhaitzaren eguna antolatu du asteburuan, eta egun osoko egitaraua izanen dute otsailaren 3an. 10:00etan txopo eta gaztainen landaketa eginen dute: Lamiarrieta inguruan 10 txopo eta Xuberon borda inguruan 50 gaztainondo. 13:00etan aperitiboa izanen da. Parte hartze kopurua jakiteko, izena emateko eskatu dute antolatzaileek.
Arratsaldean segituko du jardunaldiak. 17:00etan ipuin kontaketa musikatua izanen da Amelirekin, eta ondotik pintxoak jateko aukera izanen dute bertaratzen diren guziek. Eguna borobiltzeko, Bidenabar taldeak kontzertua emanen du 19:00etan.
Larunbatean ez ezik, igandean ere haurrek izanen dute zer ikusi. 17:30ean zinema proiekzioa izanen da, eta Ainbo, Amazoniako gerlaria filma ikusteko aukera izanen dute.