Elizondoko Gau Beltza batzordeak ospakizuna antolatu du hirugarren urtez urriaren 31n, Elizondoko Herriaren, liburutegiaren, Bertan elkartearen eta zahar etxearen laguntzarekin. Asteartea baino lehen, igande honetan plazan elkartuko dira 16:30ean, eta marrazketa tailerra eta dantza eta kantaren entsegua izanen dute.
Hilaren 31n, berriz, hainbat ekitaldi eginen dituzte arratsaldean. 17:00etan zahar etxean hasiko dute jardunaldia, bertako egoiliarrekin kantatzeko eta dantzatzeko eta egindako marrazkiak banatzeko. 17:30ean kalejira eginen dute trikitixaren soinuarekin plazaraino. Bertan, txokolatada, aurpegi margotzea eta kalabaza apainketa izanen dute. Txokolatadarako norberak bere edalontzia eramateko eskatu dute antolatzaileek.
18:30ean bi jarduera izanen dituzte. 7-9 urtekoendako Gaubela izanen da herrian barna, saria edo ziria? eskatuz. Gero, ipuin kontalaria plazan Amaia Zinkunegirekin. 10-12 urteko haur koxkorrendako Bide Beltza izanen da herrian barna, eta ondotik beldurrezko istorioak aditzeko aukera izanen dute Liburutegi Publikoan, Lur Kortaren eskutik. 19:30ean plazan elkartuko dira denak berriz beldur erretzerako eta 20:00etan dantzaldia izanen da. Honez gain, gaztaina jatea eta sagardoa ere izanen da. Ekintza gehienak plazan eginen dituzte, baina euria eginez gero Iriarte pilotalekuan izanen dira.