Gamioxarreko dolarea martxan paratu du aurten ere Jo ala Jo kultur elkarteak, Larrazken Kulturalaren testuinguruan. Sagar bilketak eta garbiketak egin zituzten joan den astean jendearen laguntzarekin, eta larunbatean izan zuten egun nagusia. Goizean sagarrak bildu zituzten, eta guzira 1.500 sagar kilo inguru jo ziren. Bazkaria ere bertan egin zuten, eta arratsaldean hasi zen tinkaldia; 700 bat litro sagardorekin bete zituzten kupelak. Azpilkuetako Ollategiko eta Arizkungo Batzabaleko sagarrak erabili dituzte aurten.
Antolatzaileek azaldu dutenez, «ez genuen besta haundi bat egin nahi, hurbiltzen zirenek parte hartzea baizik. Sagarra jotzen eta kantatuz aritu ginen giro ederrean. Hilabete pare batera zukua sagardotua egonen da, edateko prest».