Eskola maparen arabera, Zigako eskola hesten bada, gelditzen diren haurrendako Elizondoko eskola da oinarrizko eskualdeko zentroa, eta Elizondorat joan-etorrian ibiltzeko familiek garraio eta jangela zerbitzuetarako dirulaguntza izanen lukete.
Baina haurrak bertze eskola ttiki batera bidaltzeko asmoarekin, familiek bilerak egiten aritu dira ikasturte honetan eskolako zuzendariarekin, gobernuko ikuskariarekin eta hezkuntza zinegotziarekin, eskola mapa aldatzeko.
Hala ere, aste honetan Nafarroako Gobernuko lehendakariordeak, Felix Tabernak, jakinarazi du Hezkuntza Departamentuak ez duela inongo asmorik Zigako eskola hesteko. Adibide gisa paratu du Aurizko eskola, aurtengo ikasturtean lau ikasle bertzerik ez dituenak matrikulatuak. Beraz, Zigako eskolak irekia segituko du hurrengo ikasturtean.