EH Bilduko ordezkariek irakurritako oharraren arabera, «ez da ordea oraingoa, hamarkadetan etengabekoa baizik, sionismoak palestinarren aurka darabilen genozidio politikoa. Ilegalki okupatutako lurraldeak, etxebizitzak etengabe eraistea, hilketak, atxiloketak eta torturak, Gazaren gaineko blokeoa eta bonbardaketa etengabeak... Azken boladan gogortu egin du gainera jokamolde hau estatu sionistak».
Hori dela eta, EH Bilduk irmoki salatu nahi du «urteetako zapalkuntza hau eta horren aitzinean Europako estatu gehienek, Espainiak barne, Israeli eskaintzen dioten babesa». Komunikabide nagusien «manipulazioa» ere salatu nahi izan zuten, «gezur eta manipulazioen bidez, Israel biktimatzat erakutsiz eta palestinarrak terroristatzat. Badakigu zerbait honi buruz, eta ez gaituzte engainatuko». «Munduko herri zapalduontzat erresistentziaren ikur den Palestinar herriari elkartasuna» adierazi nahi dio Baztango EH Bilduk.