«Klimaren aldaketa eta biodibertsitatearen galera garai honetan herri bizigarriagoei buruz gogoeta egiteko» ibilaldia antolatu dute Baztango Talde Ekosozialak eta Amezti elkarteak. Urriaren 14an izanen da ibilaldia, Elizondoko Ahaztuen plazatik abiatuta (Fantxike ondoan), 11:00etatik 13:00etara. Ibone Ametzaga izanen da gidaria, biologian doktorea eta EHUko UNESCO katedraren zuzendaria.
Elizondon barna ibiliko dira, «herriko ingurune naturala ekosistema zerbitzuen ikuspegitik aztertzeko, hau da, herriaren barnean dauden natura-elementuek herritarren bizitza osasuntsuagoa eta hobeagoa izateko egiten duten ekarpena». Natura elementuez solastatzeaz gain, herria hobetzeko egin daitekeenaz ere arituko dira: «biodibertsitatea handitzeko, bero-uharteak saihesteko, uholdeak ttipitzeko zoladura iragazgarriak egiteko, lurraren artifizializazioa...».
Tokiak mugatuak izanen dira, hortaz, aitzinetik izena eman beharko da 620 10 20 24 telefonorat deituz edota idatziz Whatsapp edo Telegram bidez.