Joan den urteko ikasturtea euskaltegian egiteaz gain, udan Arantzan ibili zen barnetegian, eta «hasmentako egunak pixka bat gogorrak» egin bazitzaizkion ere, «esperientzia arras ona» izan zela dio. Kontent ari da euskara ikasten eta «euskara aunitz gustatzen» zaiola ere gaineratu du. Dioenez, «ez dut uste zaila denik ikastea».
Etxean «katalanez» mintzo dira, baina gainerakoan, «etxetik kanpo euskaraz solastatzen eta euskaraz bizitzen saiatzen naiz». Baita bere semeak ere: «Euskara ikasten ari dira. Bi Baztan Ikastolan ari dira eta bertzea Lekarozko institutuan».
Horrekin batera, euskarazko produktuak kontsumitzen ere hasia da: «Normalean, telebistarik ez dut ikusten, baina irratia euskaraz aditzen dut, baita podcastak eta musika ere». Eta bertako kultura ere barneratzen ari dira: «Hemengo ohiturak, Olentzero, gau beltza, inauteriak… Dena ederra da, baita auzolanean aritzeko ohitura ere. Guretako aldaketa handia izan da honat etortzea, baina, dudarik gabe, onerako».
Euskarak «ateak ireki» dizkiola ere aipatu du, eta erdal hiztunei «animatzeko» dei egin die. Esker oneko hitzak ere izan ditu, baztandarrendako bereziki: «nire eta familiaren izenean, esker mile egin diguzuen harreragatik eta eman diguzuen laguntzagatik».