Baztango Gizarte eta Berdintasun Zerbitzuak sexualitateari buruz mintzatzeko solasaldi zikloa antolatu du irailean, guraso eta irakasleei zuzendua eta herritar guziendako irekia. BerHezi berdintasun aholkularitzak emanen ditu hitzaldiak Arizkunenea kultur etxeko hitzaldi aretoan 18:00etatik 20:00etara. Hiru saio eginen dituzte, iraileko hiru ortzegunetan:
- Haur eta nerabeen sexualitatea, irailaren 14an. Haur eta gazteen sexualitatearen ezagutzaz ariko dira, bidelagun moduan eta prebentziorako aukera gisa. Oinarrizko kontzeptuak landuko dituzte aniztasun begirada batetik.
- Hezkuntza sexuala, irailaren 21ean. Sexualitatearen inguruko begirada zabalduz eta aniztasuna ardatz hartuta, bizitzako alderdi guztietan eragiten duen eta aldakorra den kontzeptu honi buruzko ibilbidea eginen dute. Gorputzaz eta harremanez ere solastatuko dira.
- Sexualitatea eta pornografia, irailaren 28an. Haur eta nerabeek pornografiaren kontsumoarekin duten harremanaren inguruan hausnartuko dute, eta hau kudeatzeko tresnak nola eskuratu daitezkeen ikusi.