Euskal Herriko Txistulari Gazteen Txapelketaren harira, Nafarroako, Gipuzkoako eta Bizkaiko hainbat txistulari gaztetxoren bilgune izan zen joan den larunbatean Bilboko BBK Aretoa. 22 bakarlarik parte hartu zuten eta horien artean ziren saria eskuratuta etxeratu ziren Aitor Ripa Eritze, Izar Inbuluzketa Arroabarren eta Eneko Irazoki Viela.
Aitor Ripa Eritzek A kategorian parte hartu zuen, hau da, 12 urtez azpikoetan. Parte hartu ez ezik, epaimahaiak lehendabiziko saria eman zion eta hala, beretako izan ziren 250 euro, garaikurra eta txapela.
B kategorian, berriz, 13 eta 16 urtekoen kategorian, lehendabiziko bi postuak Baztanen gelditu ziren. Sari nagusia (300 euro, garaikurra eta txapela) Izar Inbuluzketa Arroabarrenendako izan zen. Berez, Orkoiengoa bada ere, gurasoak Elizondokoak ditu Inbuluzketak. Bigarren postua Eneko Irazoki Viela iruritarrarendako izan zen eta 250 euro eta garaikurra hartu zituen saritzat.