Hainbat alderdi, eragile eta sindikaturen atxikimendua izan du Erdizko meategiaren kontra bihar arratsaldean Iruñean eginen den manifestazioak. Zehazki, CGT, Zurekin-Contigo, LAB, Baztan Bidasoko Turismo Elkartea, Steilas, ELA, Sortu, EHNE Nafarroa, Mendialdeko GKS, Ekologistak Martxan, ESK, Ernai, Nafarroako EH Bildu eta Euskal Herriko Bilgune Feminista taldeek egin dute bat Erdiz Bizirik plataformak deitutako mobilizazioarekin.
'Landa eremuaren defentsan' lelopean, plataformak Iruñeko karriketara eraman nahi ditu bere aldarriak, eta manifestazioan parte hartzea animatu dituzte eragile eta herritar guztiak. Gainera, joareak eramateko eskatu dute, «ahal bezain bertze asots egiteko».