Baztango I. Areto-futboleko Txapelketa Solidarioa antolatu zuten bailarako hainbat gaztek apirilaren 5etik 9ra Elizondoko kiroldegian. Bederatzi taldek parte hartu zuten, hiru multzotan aritu zirenak. Larunbatean jokatu zituzten finalerdiak eta igandean, berriz, finalak. Irabazleak Aietzak izan ziren, bigarren postuan Basaburua, hirugarrenak Vozka Juniors eta laugarren Gartzain. Honez gain, txapelketako atezain onena Iñigo Berro izendatu zuten, jokalari onena Andoni Etxenike eta pitxitxia Elur Meoki 10 golekin.
Guztira 800 euro biltzea lortu zuten, horietatik 400 euro Bidelagun elkarteari bideratuak eta gainerako 400 euroak Urdazubi, Zugarramurdi eta Baztango Eskola Ttikiei. Aritz Elizegi antolatzaileak azaldu duenez, «arras ongi joan zen, jende pila bat hurbildu zen eta giro arras ona izan genuen bortz egunetan». Heldu den urteari begira, «berriz ere egiteko gogoarekin gelditu gara».
