Baztan Ikastolak, Baztango Udalarekin batera, haurren beldurrari buruzko solasaldia antolatu du heldu den asteartean 17:00etan Arizkunenean. Alvaro Beñaran izanen da hizlaria; psikomotrizista eta pedagogoa da Beñaran, Bergarako UNEDeko psikomotrizitate eskolako kidea eta ASEFOPeko formatzailea.
Mintzaldian haurraren garapenean beldurrak duen zentzuari buruz arituko da, beldurrei aurre egiteko tresnak landuko dira eta helduen jarrerak, jokabideak eta zalantzak haurraren beldurrean duen eragina azalduko du.
Plaza mugatuak izanen dira eta interesa dutenek aitzinetik eman beharko dute izena. Horretarako, eskuragarri daude idazkaritza@baztanikastola.eus helbide elektronikoa eta 948 45 24 48 telefono zenbakia.