Nafarroako Gobernuko Hezkuntza Departamentuak Peralta Ayuesa SLP enpresari esleitu dio Oronoz-Mugairiko Lanbide Heziketako etorkizuneko ikastetxeko obrak burutzeko eta zuzentzeko proiektuaren idazketa, 435.600 eurotan, BEZa barne. Proiektua idazteko epea lau hilabetekoa da. Aurreikuspenen arabera, eraikinak 18 milioi euro inguruko kostua izanen du eta bertze 4 milioi inguru beharko dira ekipamendua ezartzeko. Obrak 2023. urtearen akabailan edo 2024. urtearen hasieran has daitezke, eta 30 hilabete inguruko epea izanen dute lanak egiteko.
600 ikaslerendako lekua izanen du ikastetxe berriak eta gainera, enplegu formakuntzako 6.000 ordu eskaintzeko baliabidea izanen ditu. Gaur egin dute bisita Oronoz-Mugairira Carlos Gimenok, Nafarroako Gobernuko Hezkuntza Departamentuko kontseilariak eta Nafarroako Gobernuko hainbat agintarik, baita Joseba Otondo Baztango alkateak eta zenbait zinegotzik eta Jorge Oteiza Oronoz-Mugairiko alkateak ere. Gainera, Iñigo Gorrotxategi eta Igor Arruabarrena, Elizondoko Lanbide Eskolako eta Berako Toki Ona institutu zuzendariak ere bertan izan dira. Gaur egun, Lanbide Heziketa egiten duten 213 ikasle dituzte Elizondon eta 65 Beran.
Ikastetxea hartuko duen orubea ikusi ondotik, Oronoz-Mugairiko herriko etxera joan dira, proiektuari buruzko azalpen teknikoak ematera.
Eraikinaren diseinua
Ia energia kontsumorik gabeko eraikina izanen da, moduluka antolatua. Denera 9.370 metro koadroko azalera eraikia izanen du, hiru solairutan banatua. Beheko solairuak 4.475 metro koadro hartuko ditu, lehen solairuak 3.060 metro koadro eta bigarren solairuak 1.835 metro koadro. Eraikinaren gibeleko aldean, ibaiari begira, agroekologia ikasketak hartuko dituen aire libreko eremua diseinatu da, baita aisialdirako gunea ere.