Hainbat baztandar agertu dira 'Herri Txiki, Amerika Handi' saioko azken programan

ETB1ek Herri txiki, Amerika handi saioko laugarren atala eman zuen igandean, eta bertzeak bertze, Bakersfield bisitatu dute Zuhaitz eta Mikelek. Baztango eta inguruko hainbat lagun ezagutu dituzte bertan.

Joxe Rekondo oronoztarra artzain joan zen duela 51 urte, 18 urterekin. Mugairera bueltatu zenean familia izan zuen, eta Bakersfielden bizi dira gaur egun. Joxe Mari Koskarat ere ezagutu du Zuhaitzek, 1975ean Ameriketara joan zen azpilkuetarra. 30 urtez aritu izan da ostatu batean lanean, eta bertan Joxe Mari Ariztoi iturendarra ere aurkitu du aurkezleak.

Joxe Mari Torres 54 urteko elbetearra ia 40 urtez bizi izan da Ameriketan, eta bertara ezkondua da. Azken artzain belaunaldietakoa izan zen, eta lorezaintzan aritzen da gaur egun. Berarekin batera Juanito Mendiburu azpilkuetarra ezagutu du Pagadik, duela 67 urte artzain joana, lehendabiziko belaunaldietakoa.

Azkenik, Maitexa topatu du Zuhaitzek, Ezterenzubiko Mattin Etxamendi artzainarekin ezkondutako iruritarra.

Saioa osorik EITB Nahieran dago ikusgai. 36. minututik aitzinera ageri dira Joxe oronoztarra eta Joxe Mari azpilkuetarra, 48. minututik aitzinera Joxe Mari elbetearra eta Juanito azpilkuetarra, eta 1:01 minututik aitzinera Maitexa iruritarra.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun