Hilabetero bezala, Baztango Kultura Zerbitzuak urtarrileko agenda kulturala argitaratu du, herritar guzien gusturako jarduerekin.
'Jolasak eta solasak'
Urtarrilaren 14an haur eta gurasoendako Jolasak eta solasak tailerra emanen du Dindaia Fundazioak Arizkunenean 17:00etan, Baztango Euskara Zerbitzuak antolatua. Ahozko tradiziotik bildutako hainbat kantu jostatzeko erara irakatsiko dituzte. Izen ematea euskara@baztan.eus helbidera idatziz.
Baztan Kantuz
Musika eta kantatzea gustuko dutenendako hitzordua Oronozen izanen da hilabete honetan. Urtarrilaren 15ean 12:00etan Urgain jatetxearen plazan elkartuko dira.
San Anton Eguna
Urtero bezala, urtarrilaren 17an, San Anton Eguna ospatuko dute Elizondoko plazan, udalak eta zahar etxeak antolatua. Txistulariak izanen dira goizean, 11:00etan zopak banatuko dituzte eta 13:00etan zozketa eginen dute.
Zinema zikloa
Iruritako Gizarte Bilgunean zinemarekin segituko dute aurten, eta hilabete honetan Berpiztu dokumentala proiektatuko dute 20an, 19:00etan. Filmak Kepa Junkeraren azken urteetako bizipenak kontatzen ditu, kultur ondarearen eta osasunaren aldarrikapena eginez.
Erakusketa
Hilaren 16tik 20ra Lur azpiko solasak. Loizuko gizona argazki erakusketa Arizkuneneko lehenbiziko solairuan izanen da ikusgai, 17:00etatik 20:00etara. Maitane Tirapu arkeologoaren Loizuko leizeko lana biltzen du erakusketak.
Solasaldia
Urtarrilaren 20an Ordesako karstaren esplorazioari buruzko solasaldia emanen du Otxola espeleologia taldeko Ernesto Pratek Elizondoko Amezti elkartean, 19:00etan.
Ibilaldia
Hilaren 21ean Amezti elkarteak Amaiurko gazteluan ibilaldia antolatu du 10:00etan. 09:30ean Elizondo plazatik abiatuko dira autoak partekatzeko, eta Amaiurko indusketa lanak eta Erratzuko bunkerrak ezagutuko dituzte, Aranzadi Zientzia elkarteko Mattin Aiestaranekin eta Xaraka Natur Bidaiak-eko Eneko Eskuderorekin.
Helduendako antzerkia
Urtarrilaren 22an Joseba Apaolazak, Ainhoa Etxebarriak eta Koldo Olabarrik Sagastitarrak antzezlana aurkeztuko dute Gizarte Bilgunean 18:00etan. Goi burgesiako familia baten istorioa kontatzen du, feminismoa eta tradizio patriarkalak kontrajartzen dituena.
Euskal Nobela Beltzaren Astea
(H)ilbeltza - Idazleekin solasean elkarteak Euskal Nobela Beltzaren Astea antolatu du bertze behin. Urtarrilaren 23tik 29ra ospatuko da aurten.