Fundacion Emplearen dinamizaziopean, Baztan, Malerreka eta Bortzirietako enplegu lan-mahaia aurkeztuko dute abenduaren 21ean, asteazkenean, Lekarozko Campusean, Harreman-Arteko Zentroan. 09:00etatik 12:00etara izanen da ekitaldi publikoa eta hainbat departamentu buru izanen dira bertan, enplegurako formakuntza baliabideak aurkezteko. Hala nola, Nafar Lansareko zuzendariak, CNAIko zuzendariak, hezkuntzako formakuntza profesionaleko zuzendariak, Cederna Garalurreko zuzendariak eta lekuko alkateek parte hartuko dute.
Ekitaldiak bi zati izanen ditu. Lehenengoan, lan mahaia aurkeztuko dute, testuingurua, egindako lana eta etorkizuneko helburuak azalduz. Hamaiketakoaren ondotik, Nafarroako formakuntza baliabideen eskaintza azalduko dute departamentu buruek.
Baztan, Malerreka eta Bortzirietako enplegu lan-mahaia Nafar Lansareak sortutako ekimena da, eskualdeko enplegu eta erronkei erantzuteko asmoz. Eskualdeko hainbat eragilek osatuko dute lan taldea: udaletxeek, gizarte zerbitzuek, insertzio enpresek, lanbide eskolako zentroek eta Nafar Lansareak.