Elizondoko Antxitoneak Onenak trinkete txapelketa antolatu du bertze behin, eta gaur eta bihar jokatuko dituzte finalerdiak eta finala. Gaurko partidak debalde izanen dira, eta lau bikote arituko dira; 19:00etan Mattin Legarreta eta Mikel Argarate, Ramuntxo Amestoy eta Arnaud Bergeroten kontra. 20:00etan, aldiz, Miki Fernandez Lascoiti eta Iñigo Anso, Denis Larretche eta Valentin Cambosen aurka.
Finalak bihar jokatuko dituzte, 18:30ean hasita hirugarren eta laugarren postuak erabakiko dituen partidarekin. 19:30ean, berriz, finalistek txapela jokatuko dute. Larunbateko sarrerak bortz euro balioko ditu, eta bildutako dirua Elizondoko Konpartsari emanen diote.