Gaur arratsaldean Baztango herrietako alkateek agerraldia egin dute Iruritako Errebote Plazan. Imanol Etxeberriak, Arizkungo alkateak, komunikatu bat irakurri du alkate guztien izenean.
Alkateek «arras larritzat» jo dute herri-kontsultak debekatzea eta «sekulako bidegabekeria» dela salatu dute herritarren iritzia zein den ezagutzeko aukera kendu izana. Zentzu horretan, hainbat galdera paratu dituzte mahai gainean:
- Zer kalte egin dezake herritarren iritzia ezagutzeak?
- Zertaz ez digute Baztango herritarroi iritzia ematen uzten?
- Zertarako balio dute Baztango ordenantzek?
- Non daude baztandarron eskubideak?
Alkateen iritzian orain «eztabaida ez da harrobia bai ala ez. Hemen benetako parte-hartzeaz eta demokraziaz ari gara solastatzen». Horregatik, «herrietako batzarrak demokraziaren sinbolotzat hartuta», azaroaren 20an batzarrak eginen dituzte herri guztietan eta, egun berean 17:00etan, elkarretaratzea antolatuko dute Elizondon.
Hortaz, «gertatutako bidegabekeria salatzeko, herritarrak animatu» nahi dituzte batzarretan eta elkarretaratzean parte hartzera, «iritzia ematean ez baita deliturik!».