Lekunberriko Jaian Jai pilotalekuan aizkora hitzordu bikoitza hartuko du azaroaren 5ean, larunbatean 17:30ean. Alde batetik, Australia eta Euskal Herriko aizkolarien arteko desafioa jokatuko da eta bertzetik, Urrezko Aizkolari Kopako lehen jardunaldia.
Australia eta Euskal Herriaren arteko aizkora desafioan, Lawrence O’Toole eta Glen Gillan australiarrek, Iker Vicente eta Mikel Larrañaga euskaldunekin neurtuko dituzte indarrak. Hamalauna enbor moztu beharko dituzte, lau modalitatetan.
Urrezko Aizkolari Kopa
Bertzetik, Urrezko Aizkolari Kopako lehen jardunaldi-kanporaketa jokatuko dute Lekunberrin. Ohi bezala, txapelketa honetako finala abenduaren 31n jokatuko dute Asteasun.
Lekunberriko saioan, Zigako Joxean Etxeberria izanen da eskualdeko aizkolari bakarra. Berekin batera, Xabier Zaldua, Ibai Soroa, Julen Larrea III.a, Txomin Amundarain eta Oier Kañamares IV.a lehiatuko dira. Aizkolari hauekin batera, 2021eko kopako hiru lehenbizikoak (Hodei Ezpeleta, Basozabal eta Gabirondo) eta 2022ko ligako hiru lehenak (Iker Vicente, Txikia IV.a eta Mikel Larrañaga) lehiatuko dira.