Saharaztan taldeak tonbola solidarioa eginen du Elizondon, urriaren 28an eta 29an ospatuko diren udazkeneko ferietan. 'Oporrak bakean' programaren barnean etortzen diren haur sahararren bidaiak ordaintzeko erabiliko dute lortutako dirua. Proiektuaren helburua «hemengo familiek udan haur sahararrei harrera egin eta ongizate bat eskaintzea» da.
Horretarako, eskualdeko komertzio, zerbitzu, ostalari eta bertzelako lantegiei laguntza eskaera luzatu diete, tonbolan sartzeko zerbait emateko prest daudenei. Produktuak eskatu dituzte eta ez dute dirurik onartuko. Informazio gehiagorako edo donazioren bat egiteko elkartearekin harremanetan jarri beharko da saharaztan@hotmail.com helbidearen bitartez.
Donazioak elkarteko kideek hartuko dituzte eta aldez aurretik laguntza eskertu nahi izan dute. Gainera, ferietan herrian egonen den postura hurbiltzera eta tonbolan parte hartzera animatu dituzte herritarrak.