Zenbait urtez ospatu gabe egon ondotik, berriz ere bueltan da Nekazalpunk musika jaialdia. Urriaren 1ean, larunbatean ospatuko dute eta 18:00etan hasita eskualdeko, Euskal Herriko, Kataluniako eta Madrilgo hamalau taldek joko dituzten kontzertuez gain, egitarau zabala prestatu dute egun osorako.
Egitaraua
Larunbatean 10:00etan artisau azoka izanen da. 10:30ean txalaparta tokata. 11:30ean, Gurean: Animalien erabilera Euskal Herriko festetan dokumentala emanen dute. 13:00etan, Orozkoko Buterflai bakarlaria ariko da. 14:00etan bazkari herrikoia eginen dute eta bazkalondoan, banatzaile alternatiboen feria. 16:00etan kontzertu akustikoa emanen dute Olaia (Lesaka) eta Andreina Jolin (Iruñea) musikariek. 17:30ean, Baztan eta Lesakako musikariek osatutako Ajataka taldeak perkusio kontzertua emanen du eta 18:00etan kontzertuak hasiko dira.
Sarrera 5 euro ordaindu beharko da, taldeak laguntzeko. Eskualdeko, Euskal Herriko, Kataluniako eta Madrilgo hamalau talderen musika adituko da Merkatu Plazan: Goroldio (Baztan), Ozpinduk (Malerreka), Bip (Bera), Aho Zakil Konekxion (Zugarramurdi), Hummus de Lombriz (Arrarats), Larba (Malerreka), Därsel (Madril), Piñen-Aborto Sonoro (Berga, Katalunia), Ernia (Zarautz), Bruma (Urola Kosta), Kuma no motor (Baiona), D+I (Altsasu), I+D (Altsasu), Zakill (Lekaroz) eta Munizia Polizial (Madril).