Idorteen eta suteen inguruko mintzaldia antolatu du Baztango Talde Ekosozialak ortziralean

Ttipi-Ttapa 2022ko ira. 21a, 19:00

Iñaki Barcena EHUko irakasleak eta mugimendu ekologistako kideak emanen du solasaldia

Baztango Talde Ekosozialak Idorteen, suteen, alimaleko beroen garaian… ekologia gehiago! solasaldia antolatu du irailaren 23an 19:30ean Elizondoko Ahaztuen plazan (Fantxike ondoan). Euri eginez gero, Arizkunenera mugituko dute jarduera. Mintzaldia Iñaki Barcenak emanen du, EHUko irakaslea eta mugimendu ekologistako kidea.

Taldeak adierazi duenez, «aspaldi da klimaren aldaketaz ohartarazten gintuztela zientzialariek eta mugimendu ekologistako kideek. Eta aspaldi da ere etengabeko hazkundean oinarritzen den sistema kapitalistaren bideraezintasunaz ohartarazi gintuztela, berotegi efektuko gasen isuria murriztea beharrezkoa zela erranez.

Urteak joan urteak etorri, ohartarazpenei kasurik egin ez, eta orain alimaleko beroak, idorteak, suteak... bizitzen ari gara eta horrek herritarren artean alimaleko kezka eta zirrara piztu du geroari buruz. Horri, energiaren krisia gehitu behar zaio, bioaniztasunarena... Testuinguru horretan, oraingo erronka handiei erantzuna ekologia sozialetik etorriko dela argi dago. Horrela, herritarren oraingo kezketatik tiraka gure munduan gertatzen ari diren sakoneko joerez, geroaldiaz eta alternatibez mintzatuko zaigu Iñaki Barcena.

Modu berean, egoera nahasi honetan, Euskal Herriko mugimendu ekologistak biltzar handia prestatu du, Ekotopaketak izenekoa. Justizia klimatikoaz eta justizia sozialaz aritu eta mugimendu azkar bat abiarazteko Hego Euskal Herrian. Portugaleten eginen da Ekotopaketa buruilaren 30ean eta urriaren 1ean eta 2an eta Elizondon eginen den mintzaldia Ekotopaketa aurkezteko ere izanen da».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun