Jendea bizikletaz bidaiatzera animatzeko Baztango Talde Ekosozialak esperientzien trukea antolatu zuen abuztuaren 10ean, asteazken goizean, Elizondon. Ahaztuen plazan egindako hitzordura jende multzoa hurbildu zen eta han aritu ziren bizikletaz bidaiatzeko kontuen inguruan: nolako bizikletarekin bidaiatu, ze zirrikak erabili, lo egiteko ze kanping, lo zaku eta isolatzaile eraman; kozinatzeko sistemak, bidaiatzeko beharrezkoak direnak garraiatzeko nolako zakutoak erabili, eskutokirako ze zakuto, trena eta autobusekin nola tartekatu… Esperientzien trukea aski emankorra izan zen.
Oraingo krisi ekologiko, klimatiko eta energetikoaren erdian aldaketa ekonomiko, sozial eta kultural handiak etorriko direla uste du Baztango Talde Ekosozialak. Horren testuinguruan bizitzeko modua aldatu beharko dela uste du eta aldaketa horiek modu baikorrean landu nahi izan zituen atzoko saioarekin.
Alta, Talde Ekosozialetik ohartarazten dute jendeen aldaketa hutsarekin ez dela aski izanen, krisi ekologiko eta energetiko honen sortzailea etengabeko hazkundean oinarritzen den sistema kapitalista baita.
