Eskualdeko kirol talde gehienek denboraldia bukatu dute, baina Baztan futbol taldeko jubenilek partida garrantzitsua izanen dute ekainaren 11n, larunbat goizeko 11:00etan Aibarko San Lorenzo zelaian. Hain zuzen, kopako finalerdia jokatuko dute Villatuertako CD Ondalan taldearen kontra. Irabazleak, Kasedan jokatuko den bertze finalerdiko (Ardoi eta Valtierrano) irabazlearen kontra jokatuko du finala.
Kopan, bere multzoko buru izan ondotik, nahiko erraz nagusitu da ondoko kanporaketetan Baztango jubenilen taldea. Lehen kanporaketan 0-5 irabazi zion Berriozarri; final zortzirenetan 4-1 irabazi zion Corellanori eta final laurdenetan 6-0 Azkarrenari. Orain, finalerako txartela eskuratzeko Villatuertako Ondalan taldea menperatu beharko du.