BRT Menditarrak errugbi taldeari harrera egin diote Baztango Balleko Etxean

BRT Menditarrak taldeari harrera egin diote Balleko Etxean, bigarren mailan euskal ligako txapeldun suertatu ondotik. Argazkia: Juan Mari Ondikol

BRT Eguna ospatuko dute maiataren 28an Lekarozen eta gazteek euskal ligako finala jokatuko dute

BRT Menditarrak errugbi taldeko seniorrek euskal ligako bigarren mailan txapeldun izan dira. Hori dela eta Baztango Udalak harrera eskaini zien maiatzaren 25ean, asteazken arratsaldean Baztango Balleko Etxean. Joseba Otondo alkateak eta Xabi Maia zinegotziak oroigarria eman zioten taldeko jokalari eta entrenatzaileei.

Euskal ligako bigarren mailan txapeldun izateak lehen mailara igotzeko aukera eman dio BRT Menditarrak taldeari, baina oraindik ez dute erabaki hala eginen duten. «Txapeldun izateak igotzeko aukera ematen digu bai, baina hori baina lehen jokalari nahiko garen eta taldearen egoera ikusi beharko dugu», aipatu digute. Erabakia hartu eta berehala jakinaraziko dute datorren denboraldian zein mailatan ariko diren.

Jokin Urreaga elbetearra, Joseba Otondo alkatearen eskutik oroigarria hartzen. Argazkia: Juan Mari Ondikol

 

BRT Eguna eta gazteek euskal ligako finala larunbatean

Aipatzekoa da BRT Eguna antolatu duela maiatzaren 28an BRT Menditarrak taldeak. Larunbatean 10:30ean, 18 urtez beheitiko Itsasmendi taldeak (BRT, Zarautz eta Irungo Txingudi taldeko jokalariak hartzen ditu) Rioja RC  taldearen kontra jokatuko du euskal ligako finala. Ondotik 12:00etatik 14:00etara Baztan Seven txapelketa jokatuko dute lau taldek: BRT Menditarrak, Txingudi errugbi taldea, Zarautz errugbi taldea eta Kataluniatik datorren Manresa Rugby Club. 15:00etan zikiro-jatea izanen dute eta 17:30etik 21:00etara musika, edaria eta giro ona.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun