Hainbat motatako lanak egiten dituzte; ehunak, kosmetikoak eta xaboiak, egur tailla, sukaldeko tresnak… Molinuevok, adibidez, txalaparta ttikiak egiten ditu, «kasualitatez hasi nintzen, leku batean txalaparta ttiki itsusi batzuk ikusi nituen, eta hobe egin zitekeela pentsatu nuen, eta horrela hasi nintzen». Honez gain, azpimarratu nahi izan du «elkartean ez dauden artisau garrantzitsuak daudela Baztanen; Dufurrena kaikugilea, Soule hargina, Repi larrugilea…».
Haien produktuak ezagutzera emateko merkatuak egiten dituzte Elizondoko plazan, «udan larunbatero eta udazkenetik aitzinera hilabeteko lehenbiziko eta hirugarren larunbatean». Aste Santuari begira ere prestatzen hasi dira; «azoka handia eginen dugu Elizondon Ortzirale eta Larunbat Santuan, artisau, elikagaien ekoizle eta bertze hainbat gonbidaturekin». Jendearen interesa pizten dute, «baina sasoi turistikoetan egiten dugu lan gehien».