Joan den martxoaren 29an POCTEFA - FORMA NAEN programaren laugarren saioa egin zuten Arizkunenean, 'Nola integratu Agenda 2030eko Oinarri Horizantal Euroeskualdean' izenpean. EAEko, Nafarroako eta Iparraldeko zentroek parte hartu zuten, baita Elizondoko Lanbide Eskolak ere. Aitzineko hiru saioetan bideratu zen 'Jardunbide Egokiak Lanbide Heziketan' proiektuan izandako esperientziak partekatu zituzten. Elizondoko Lanbide Eskolaren kasuan, Administrazio eta Finantzetako 2. Goi Mailako Lanbide Heziketa Zikloan landutako '2030 Agenda Enpresen Ikuspuntutik ezagutzea' jardunbidea aurkeztu zuten.
Jardunaldiaren helburua 2030eko agendako oinarri horizontalak Lanbide Heziketara aplikatzea izan da, Jardunbide Egokien Gida sortu ahal izateko, bertze zikloetan ere erabilgarria izanen dena. Elizondoko Lanbide Eskolaz gain, Usurbil LHII, Plaiaundi LH, Donapea LHI, IEZ Zubiri Manteo BHI, Izarraitz LHII ikastetxeetan landutako praktikak aurkeztu ziren, Ikaslan Gipuzkoa, TKNIKA eta Ados Sostenibilidad y Clima-ren gidaritzapean.
Mugaz gaindiko administrazio kudeaketa
Apirilaren 8an Irungo Ficoban Gipuzkoa, Nafarroa eta Pirinio Atlantikoetako Lanbide Heziketako ikastetxeetako 119 ikaslek parte hartu dute mugaz gaindiko administrazioari buruzko prestakuntza-jardunaldi batean, POCTEFA 'FORMA NAEN' Europako egitasmoaren esparruan.
Elizondo Lanbide Eskolatik, Administrazio eta Finantzetako 2. Goi Mailako 12 ikaslek hartu zuten parte ekitaldian. Mugaz bi aldeetako langileen lanerako desplazamenduak eta zerga ezberdinak landu zituzten, lehenik egindako aurkezpenekin eta gero, hainbat ikastetxetako ikasleak 10 laguneko lan taldetan banatuta landutako erronketan.