«Amaiur Gaztelu elkartearen lana euskal memoriaren aldekoa izan da» dio Sabino Arana Fundazioak saria arrazoitzerakoan. Funtsean, Amaiurko gazteluaren eta herriaren erran-nahia berreraiki eta balioa emateagatik hartu dute aitortza.
«Gure arbasoen historia ezagutu behar dugu herri bezala aitzinera egiteko»
Isabel Aleman Amaiurko alkateak monolitoaren laburpen historikoa egin du saria hartzerakoan eman duen hitzaldi laburrean, eta gogora ekarri du bere garaian «herritarren diru-ekarpenekin eta garai hartako euskal erakundeen laguntzarekin» eraiki zela.
Bere hitzaldian gogorarazi du monolitoa bota zutela «Amaiurrek ordezkatzen duen memoria historikoa ezabatzeko intentzioarekin», eta 1982an monumentua eta bere erran-nahia berreskuratzeko, Gaztelu Elkartea sortu zela azaldu du. Alkateak azpimarratu duenez, mende honetan «gure herriaren memoria zientzian oinarritzen dugu, eta horregatik ekin zaio gazteluaren eta Amaiur inguruaren arkeologia eta musealizazio-lanari». «Gure arbasoen historia ezagutu behar dugu herri bezala aitzinera egiteko» gaineratu du.
