Lekarozko herriak adierazi duenez, «Arizkungo batzarrak Canteras Achak Aintzialdeko lurretan egin nahi dituen zundaketen harira aurkeztutako testua irakurri eta bozkatu egin zen. Bozka guztiak testuaren aldekoak izan ziren, ondorioz, Lekarozko herriak bat egiten du arizkundarren erabakiarekin zundaketa eta harrobiaren kontra».
Aldi berean, bertze testu bat aurkeztu zitzaion herriari, «2021eko udaberrian Aroztegiko lanak geldiarazi zituzten protestetan ustez parte hartzeagatik deklaratzera izan diren sei herritarrei elkartasuna adierazteko». Testua irakurrita bozkatu egin zuten eta denak testuaren aldekoak izan ziren, beraz, «Lekarozko herriak babesa eta elkartasuna adierazten die deklaratzera deituak izan diren sei herritarrei, inposatu nahi duten Aroztegiko proiektua ez zutelako sei herritarrek gelditu, herri oso batek baizik. Borroka hori ez zen sei lagunen artean eraman, eta ez da sei lagun epaitegietara eramanez geldituko. Horregatik, Lekarozko herriak dei egiten die herritarrei urtarrilaren 27an 09:00etan Nafarroako Auzitegiaren aitzinean eginen den elkarretaratzean parte har dezaten».