Oporren atarian gaudela, «Gabonetako erosketak denborarekin egitea» gomendatzen du, «baina azkeneko momentura arte ez dugu pentsatzen zer oparitu edo ez gara animatzen erostera eta azkenean bertako komertziora jotzen dugu presaka. Guretako abenduaren 15etik aurrera hasten dira Gabonetako erosketak, jende gehiago ikusten da orduan».
Badira erosketak Internet bidez egitea erabakitzen dutenak, baina «zerbitzua eta aurrez aurreko tratua» dira herriko denden indargunea; «Internetetik erosita ez duzu inolako zerbitzurik, produktua ez gustatzea gertatu daiteke, zailago da bueltatzeko… hemen erosita dendariak jakin beharreko guztia azalduko dizu». Honi esker, «komertzio ttikiak biziko gara, estutasun aunitz pasako ditugu, baina biziko gara».
Izan ere, «arras kontent» dago Sobrino bezeroekin. 25 urte daramatza dendan lanean, eta «denbora hobeak bizi izan ditugu, baina txarragoak ere bai. Ez gara kexu». Komertzio guztiek bezala, pandemiaren ondorioa nabaritu dute, «baina bertako jendea arras ongi portatzen ari da».
«Argi dugu asoziazionismoa ikaragarri ona dela guretako»
Elkarteen garrantzia ere azpimarratu digu. 'Bertan' Baztango merkatarien elkartea 2006an sortu zen eta hasieratik hor egon da Fantxike; «Argi dugu asioziazionismoa ikaragarri ona dela dirulaguntzak lortzeko, promozioak egiteko, ikastaroak antolatzeko… bakarrik lortu ezin duguna lortzeko. Bertze merkatariak lankideak dira, ez lehiakideak. Informazioa elkarri eman behar diogu eta elkar lagundu».
Elkarteak urtero egiten du kanpaina bereziren bat Gabonetan. «Azken urteetan tonbola bat egin dugu eta iaztik saskiak zozketatzen hasi gara. Komertzio bakoitzak 50 euroko opari bat ematen du eta hiru saski txukun osatzen ditugu». Erosketak egiteagatik zozketan parte hartzeko aukera izanen dute bezeroek eta abenduan hiru astetan jakinaraziko dituzte irabazleen izenak.
Elizondo apaintzeaz ere arduratzen dira, herriari kolorea eta argia emanez. «Egia da guk dendan ez dugula hainbertzeko zaletasunik, baina beti saiatzen naiz zerbait egiten; erakusleihora arropa gorriak edo neguko marrazkiak dituzten pijamak ateratzen ditut, atean Olentzero bat izaten dugu eskutitzak botatzeko aukerarekin…».