Azaroaren 20tik 28ra ospatzen ari dira Europako Hondakinen Prebentziorako Astea (EWWR) eta horren harira egin zuten ortziraleko aurkezpena Lekarozen. Cirizarekin batera, Xabier Maia Baztango alkateordea, David Campion Irumerriko Mankomunitateko presidentea, Fernando Mendoza Hondakinen Kontsortzioko kudeatzailea eta Nafarroako bertze mankomunitatetako ordezkariak.
Organikoa etxeetan sortzen den hondakinaren erditsua izaten da eta egoki bereiztea funtsezkoa da zabortegietara ahalik eta hondakin guttien ailegatzeko. Nafarroan 2020an 41.599 tona materia organiko bildu ziren.
Eskualdeko pertsonaia ezagunak bideoan
Kanpaina honetan Nafarroako 125 pertsona ezagunek parte hartu dute, horietatik aunitz eskualdekoak: Estitxu Pinatxo Berako abeslaria, Itxaso eta Irune Elizagoien Etxalarko trikitilariak, Patxi Larretxea Arraiozko herri kirolaria, Oinatz Bengoetxea eta Iera Agirre Leitzako pilotariak, Saioa Jaurena Elizondoko errugbi jokalaria, Iñaki Perurena Leitzako harri-jasotzailea, Julen Larretxea, Aimar Saldias, Eloi Otxandorena, Josetxo Ezkurra eta Aimar Jabalera Malerrekako erremontistak, Diana Iniesta Erratzuko margolaria edo Aurtitz, Ituren eta Zubietako joaldunak ageri dira, Nafarroako kirol, kultura, gizarte eta politika arloko bertze hainbat lagunekin batera.
