Baztan eta Malerrekako sei hirukotek eman dute izena Laxoa Elkarteak antolatutako Nafarroako paxaka txapelketaren 22. edizioan. Lehen jardunaldia azaroaren 21ean, igande arratsaldeko lauretatik aitzinera jokatuko dute Iruritako Aranabia pilotalekuan. Sei hirukote horietatik bi lehenbizikoak zuzenean sailkatuko dira ilbeltzaren 9an jokatuko dituzten finalerdietarako. Azken lauren artean, berriz, final laurdenak jokatuko dituzte astebete lehenago eta irabazleak ariko dira bi lehenbizikoen kontrako finalerdietan. Final handia ilbeltzaren 16an jokatuko dute.
Lehen jardunaldia igandean
Azaroaren 21ean, igandean 16:00etan hasita jokatuko dute lehen jardunaldia Aranabian, honako partida hauekin:
- Oskar Urrutia (Irurita), Iker Bereau (Oiz) eta Juan Mari Maia (Elizondo); Xabier Barberena (Irurita), Egoitz Prim (Irurita) eta Aritz Alundaren (Arraioz) kontra.
- Gorka Urtasun (Irurita), Ugutz Zelaieta (Oiz) eta Jabi Apeztegia (Doneztebe); Ioritz Zelaieta (Oiz), Laurendi Zelaieta (Oiz) eta Iban Juanenaren (Doneztebe) kontra.
- Jon Apeztegia (Doneztebe), Mikel Telletxea (Doneztebe) eta Iban Santesteban (Doneztebe); Manu Irigoien (Erratzu), Mikel Sagaseta (Irurita) eta Kaiet Itoitzen (Erratzu) kontra.