Segundo bakarra ez da alde handia lokotx-biltze txapelketan, baina segundo bakar horregatik ez du Euskal Herriko txapela janzterik izan Asier Gamio berroetarrak. Izan ere, larunbatean Laukizen (Bizkaia) jokatutako finalean 6 minutu eta 27 segundo behar izan zituen txapeldun suertatu zen Jon Larrañaga gipuzkoarrak eta 6 minutu eta 28 segundo Asier Gamiok.
Gibeletik, Aritz Martin bizkaitarrak osatu zuen podiuma (6.43). Patrik Saitua bizkaitarra laugarren izan zen (6.44), Aritz Iturribarria arabarra bosgarren (6.48) eta Guillermo Lopez arabarra seigarren (6.57).
Lasto-jasotzen Tubi txapeldun
Euskal Herriko lasto-jasotze txapelketa ere jokatu zuten Laukizen eta Jose Martin Bustinza Tubi bizkaitarra suertatu zen txapeldun, 45 kiloko fardoa zazpi metroko altuerara bi minutuan 23 altxatu ondotik. Beñat Amade bizkaitarra bigarren izan zen (21 altxaldi) eta Jon Lapazaran arabarra hirugarren (20 altxaldi).