Garraioa errazteko eta segurtasuna hobetzeko asmoz autobus geltoki berri bat eta aparkaleku bat eginen dituzte Oronoz-Mugairin

Ttipi-Ttapa 2021ko urr. 27a, 18:00

Nafarroako Gobernuak gaurko bilkuran premiazkotzat jo du Oronoz-Mugairin autobus geltoki berri bat eta aparkaleku bat eraikitzeko ondasunak desjabetzea. Azpiegitura horretan hainbat autobus aldi berean aparkatzeko tokia izanen da, eta 21 autorentzako aparkalekua ere eraikiko dute.

Azpiegitura NA-8303 errepidean eraikiko dute, Martin Urrutia etorbidean. Gisa honetara, «garraio publikoko, aparkalekuko eta pasabideko erabiltzaileen segurtasuna hobetu» nahi du Nafarroako Gobernuak, eta erabilera bereizteko bi plataforma eraikiko dituzte: horietako bat autobusak aparkatzeko eta horiek maniobrak egiteko, eta bertzea, aparkaleku publikorako. Bi eremuak bata bertzearen artean bereiziak izanen dira.

Autobus geltokiak 1.500 metro koadroko eremua izanen du eta hiru dartsena izanen ditu. Autobusen aparkalekuek 8 metroko zabalera eta 12 metroko luzera izanen dute, eta nasek 12 metroko luzera eta hiru metroko zabalera.

Aparkaleku publikoak, bertzalde, 1.200 metro koadro izanen ditu, eta autoentzako 21 plaza eraikiko dituzte, horietako bat mugikortasun murriztua duten pertsonentzat egokitua.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun