Urtebetez feriarik gabe egon ondotik, aurten ezohiko feriak ospatuko dituzte ortziralean Elizondon. Ez da kanpoko komertziorik eta artisaurik izanen, baina, bertako abeltzainen azienda eta makineria ikusgai egonen da egun osoan merkatuko plazan. Baztango hainbat artisauk eta komertziok ere haien produktuak karriketara aterako dituzte.
Pilota partidak
Eguna girotzeko, Elizondoko Herriak Aspeko pilotari profesionalen bi partida antolatu ditu. 18:00etan hasita, Julen Egiguren V.a eta Xabi Erostarbe Iker Salaberria goizuetarraren eta Oier Etxebarriaren kontra arituko dira. Bigarrenean, Iker Irribarria eta Beñat Rezusta Danel Elezkano eta Jose Jabier Zabaletaren aurka ariko dira. Baztan pilotalekuan izanen dira bi partidak eta sarrerak salgai daude dagoeneko Futbolin ostatuan eta Internet bidez. Ortziralean ere 17:00etatik aitzinera lehiatilan erosi ahal izanen dira.