XXXIV. 'Ordizia Txapeldun' gasna lehiaketa egin dute gaur eta azken hamar urteetako saridunak lehiatu dira bertan. Kortariko gasnak bi aldiz irabazi duenez (2018an eta 2019an), bi gasna aurkezteko aukera izan du Julen Arburua lekaroztarrak eta lehenbiziko eta hirugarren sariak lortu ditu. Gainera, urrezko gasnaren saria ere eraman du gasnak 8,5eko nota gainditu duelako, 9,07 punturekin. Otatza gaztandegiko Joseba Insausti ordiziarra bigarren sailkatu da lehiaketan eta maila «paregabea» eman dute lehiakide guztiek.
Epaimahaian aritu dira Jose Juan Castillo lehendakari dutela, Felix Manso (Manso Jatetxea, Irun), Imanol Zubelzu (Basque Culinary Center), Victoria Urresti eta Patxi Perez Elortondo (Idiazabal Jatorri Izendapeneko teknikariak), eta Eli Belaunzaran (El Diario Vasco) eta Aitzol Zugasti (Revista ON) kazetariak.