Lehenbiziko aldiz Espainiako Parkour Txapelketa jokatu zen asteburuan Nafarroa Arenan, eta Aimar Obregozo elizondoarrak ez zuen hutsik egin nahi izan. 17 urtez beheitiko kategorian estilo librea eta abiadura neurtzeko modalitateetan parte hartu zuen, eta estilo librean bikain moldatu zen. Sailkapen proban lehenbiziko gelditu ondotik, finalera sailkatu zen eta finalean maila ederra eman zuen. Azkenean bigarren gelditu zen, baina bere aitzinetik gelditu zenarekin puntuazioan berdinduta gelditu zen. Domina eta diplomarekin batera, arropatan gastatzeko 300 euroko opari txartela hartu zuen saritzat.