Baztango Dantzariek eta Elizondoko Gaitariek hilero antolatzen duten bailableak egin zituzten bertze behin ere joan den igandean Elizondoko Foruen Plazan. Ikasturteko azken saioa izanen zela iragarri zuten, eta azkena zela aprobetxatuz, Elizondon egindako ohiko dantza saioaz gain, Baztango herri guztietan sorpresa ederra hartu zuten. Argazkiak: Juan Mari Ondikol
Izan ere, goizean goiz, hamabortz herrietan gaitari eta atabalariak beren musikarekin karrikak alaitzen ibili ziren. Elizondoko Gaitariez gain, Baigorrikoak, Iruñekoak, Bizkaikoak, Uhartekoak, Burlatakoak, Martzillakoak, Ablitasekoak, Zangozakoak eta Artaxoakoak hurbildu ziren herrietara, igandeko egun ederra musikaz are ederragoa bilakatuz.