1971ko maiatzaren 24ean 19:00etan ireki zuten Baztango liburutegia. Geroztik, hiru kokaleku, hiru liburuzain eta milaka liburu izan ditu herritarren eskura. Egun berezi hau ospatzeko elkartu ziren astelehenean bertan lan egindako hiru liburuzainak; Maria Angeles Arraztoa, Ines Zayas eta Sonia Lopez. Haiekin batera, Nafarroako Liburutegi Sareko Clara Flamarique, Joseba Otondo alkatea, Mari Jose Garmendia kultura zinegotzia eta Anastasio Nagore eta Ruben Ziganda hautetsiak bertan izan ziren.
Liburutegiaren inguruko bizipenak kontatu zituzten ekitaldian, eta Mattin Maiora elizondoarrak Zorionak zuri kantua jo zuen akordeoiarekin. Akitzeko, liburuzainek lore sorta bana jaso zuten, Baztango kulturaren alde egindakoa eskertuz.
Argazkiak: J. M. Ondikol