Berroetako plazan 08:00etan elkartuko dira lasterkariak igandean dortsal banaketarako, beroketa zonaldera pasatuko dira eta ordu bat beranduago lasterketa abiatuko dute. Irteera 100 parte hartzaileko lau txandetan eginen dute; 09:00etan, 09:02an, 09:04ean eta 09:06ean.
Lasterketak 21,6 kilometro distantzia eta 1.274 metroko desnibela izanen du. 500 metroz musukoa soinean eraman beharko dute lasterkariek, adierazitako eremuraino, eta segurtasun distantzia mantendu beharko dute lasterketa guztian. Bortz hornidura postu paratuko dituzte erabilera bakarreko edalontziekin eskuragarri. Helmugara iristean parte hartzaileek musukoa paratu beharko dute berriz eta nahiz eta dutxarik ez izan, garbiketa gune bat sortuko dute hanka eta zapatilak garbitzeko.