Nafarroako Gobernuko Lurralde Kohesiorako Departamentuak, Herri-Lanen eta Azpiegituren Zuzendaritza Nagusiaren bitartez, N-121-B errepiderako sarbide berri bat eraikiko du Elizondon, Foruzaingoaren polizia-etxearen inguruan. Lurralde Kohesiorako Departamentuak behin-behineko onarpena eman dio jendaurrean jarrita dagoen proiektuari, gaur argitaratu dute Nafarroako Aldizkari Ofizialean eta datorren hilabetean alegazioak aurkez daitezke.
Bernardo Ziriza, Nafarroako Gobernuko Lurralde Kohesioko kontseilaria Joseba Otondo Baztango alkatearekin, Florentino Goñi Baztango Herri Lanetako zinegotziarekin eta Aitor Bazterrika Elizondoko alkatearekin bildu da gaur, eta proiektuaren xehetasunak ezagutu dituzte. Pedro López Herri Lan eta Azpiegituren zuzendari nagusia ere izan da bileran.
N-121-B errepidearekin 50,070 kilometroan bat eginen du bide berriak eta, honela, ibilgailuek ez dute Elizondoko zeharbidea erabili beharko. Izan ere, gaur gaurkoz, N-121-B errepideak ez dauka sarbide zuzenik Elizondora.