Lekarozko Aroztegia proiektuaz

Azken asteetan Aroztegian gertatutakoa salatu du Lekarozko alkatetza taldeak

«Hondeamakinek gibelean utzi duten txikizioa» salatu dute alkatetza taldetik, «lanak esleitzeko prozedura epaitegietan egon arren, bide publikoak itxi eta hondeamakinak Aroztegiko inguruetan sartu zituzten».

Sukiletx ingurua bereziki kaltetua izan dela salatu dute; «inguruko arbolak mozteaz gain, Telleria errekako bazterrak xehatu dituzte hondeamakinen pasoarekin, baita harrizko zubia bera ere. Erreka gainetik pasatu ahal izateko zubiaren bazterreko paretak birrindu dituzte eta zubia bera kaltetua izan da pisu handiko makinen lanaren ondorioz».

Aroztegiko egitasmo urbanistikoa «inposatua» izan dela oroitarazi dute; «2009an herriko batzarrak deitutako herri galdeketan lekaroztarrok ezetza eman genion proiektuari, eta 2016an Batzar Nagusiak antolatutako herri galdeketan baztandarrok ezetza eman genion proiektuari».

Proiektuaren ondorioz «beren lurrak galdu eta kaltetuak izan diren herritarrei» bere elkartasuna helarazi nahi izan dio alkatetza taldeak eta Nafarroako Gobernuari «UGPS-a bertan behera utz dezan eta baztandarron borondatea errespeta dezan» eskatu dio. Gainera, larunbatean Elizondon antolatuko duten manifestaziora joatera animatu dituzte herritarrak.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun