Hirugarren urtez Liburuaren Eguna ospatu dute Anizen

Apirilaren 23an Liburuaren Eguna dela baliatuz, Anizen hirugarren urtez nazioarteko egun hau ospatu zuten joan den ortziralean. Bertzeak bertze, istorio bat osatu zuten, haurrek hasi eta heldu batek osatu zuena. Horrez gain, mural bat ere margotu zuten.

Eguna ailegatu baino aste bat lehenago, alkatea Anizko haurrekin bildu zen eginen zenaren nondik norakoak azaltzeko. Anizko haur guztien artean istorio bat osatzea izanen zen aurtengo zeregina. Haur bakoitzak hasita zegoen ipuin zatiari jarraipena eman zion, aitzinetik egindako zozketaren arabera, zegokion egunean aitzineko haurrak pasatutakoa leitu eta berea osatuz.  Istorioaren akabaila aniztar heldu batek egin zuen eta bera izan zen ipuina oso-osorik leitu zuena. Ipuina aditu ondotik, frontoian berean mural gisako bat egin zuten ipuinak sorrarazi zien edozein irudi marraztuz. Haurrak ez ezik, gurasoak ere aritu ziren margotze lanetan.

Argazkiak eta testua: Maitane Maritorena.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun