Lekarozko Aroztegia proiektuaz

EHNEren ustez Aroztegiko proiektua «azkar aberastu nahi duten pertsona guti batzuen interes espekulatiboen» mesedetan da

Ttipi-Ttapa 2021ko api. 16a, 09:30
EHNE-Nafarroa Aroztegiko espekulazio-proiektuaren aurka agertu da eta legez kanpoko obrak hastea eragozten ari den herri-borrokarekin bat egin du. Gisa honetako espekulazio-proiektuak landa-garapen orekatu baten kontrakoak direla salatu du eta inguruneari, kulturari, hizkuntzari eta idiosinkrasiari zor zaien errespetuaren kontrakoak direla uste du.

EHNE-Nafarroak ez du nahi Lekarozko lurretan egin nahi den hirigintzako espekulazio-proiekturik. Proiektu horren baitan luxuzko hotela, golf-zelaia eta 228 etxebizitza berri eraikiko dira 340 biztanle inguru bizi diren herri batean. Horregatik, sindikatuak «bat egin du obrak hastea eragozteko Baztango bizilagunak daramaten herri-borrokarekin, erabaki judizial batek obren hasiera legez kanpoko dela ebatzi ondotik».

«Gauza eginen» dinamika inposatu nahi dute

Prentsa-ohar batean EHNEk azpimarratu du «Nafarroako Kontratu Publikoen Administrazio Auzitegiak 2019ko uztailaren 23an adierazi zuela ezinezkoa zela esleipen-prozedurarekin segitzea. Akordio hori proiektuaren sustatzaileek behin eta berriz urratzen dute, eta, gainera, sustatzaileek ausarkeriaz hartu dute aurrerapausoa emateko erabakia, gauza eginen dinamika inposatuz, eta Foru Gobernuak berehala geldiarazi beharko luke obra».

Are gehiago, EHNEk ohartarazten du «Vianako Printzea erakundearen menpeko Nafarroako Ondasun Departamentuak hotelaren proiektuaren aurkako txostena egin zuela, araudia betetzen ez zuelako. Horri gehitu behar zaio Baztango Udalak, Lekarozko herriak eskatuta, ermitaren jabetzari buruzko demanda bat irabazi duela, ekimen espekulatibo honen sustatzaileek eurentzat sartu zutena».

Nekazaritzarako beharrezkoa diren lurrak galtzen ari gara

«Bizitegi- eta ostalaritzako azpiegitura horiek eraikitzeak galera handia dakar nekazaritzan eta abeltzaintzan erabiltzeko beharrezkoa diren lurretan». EHNEk aldarrikatzen du «eskualdeko ekoizpen-sektore garrantzitsuenetako bat» dela nekazaritza, eta espekulazio-proiektu honekin «erosteko ahalmen handia duten herritarren gozamenerako» bideratu nahi direla lursail horiek eta, horrela, «Baztan hirigintza-espekulazioko eremu bihurtuko» dela.
 

«Horrelako proiektuak landa-garapen orekatu baten arras kontrakoak dira»

EHNE-Nafarroarentzat «horrelako proiektuak landa-garapen orekatu baten arras kontrakoak dira» eta «ez diote inolako errespeturik erakusten inguruneari, kulturari, hizkuntzari eta idiosinkrasiari. Gainera, ez da kontuan hartu auzotarren borondatea, herri-bozketa baten bidez proiektu honen aurkako jarrera irmoa adierazi baitzuten, ez eta toki-erakundeena ere, horien erabakiak ez baitira entzun udalaz gaindiko Garrantzizko Plan Sektorial (PSIS) bat inposatuz». Horiek horrela, «berehala bertan behera uztea eta obrak geldiaraztea» eskatzen du nekazarien sindikatuak.
 

«Azkar aberastu nahi duten pertsona guti batzuen interes espekulatiboei soilik erantzuten die proiektu honek»

EHNE-Nafarroaren idurian «bistan da proiektu hau ez dela eskualdearen eta Nafarroaren onurarako. Proiektu honek modu partikular eta azkarrean aberastu nahi duten pertsona guti batzuen interes espekulatiboei soilik erantzuten die».

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun