Elizondoko Baztan Pilotalekuan hartuko dute berriz ere Baztan, Urdazubi eta Zugarramurdiko 80 urtetik goitikoek txertoa heldu den astelehenean. Hurrengo egunean, 70-80 urte bitartekoak deituak izanen dira haien lehenengo txertoa hartzeko.
Bilduko den jendetza aurreikusita, antolakuntzari aurre egiteko boluntarioen bila dabil Udala. Txandak antolatuko dituzte horretarako astelehenean, 09:00etatik 12:00etara eta 12:00etatik 15:20ra. Astearteko ere goiz eta arratsaldeko txandak aurreikusi dituzte, nahiz eta ordu zehatzik ez jakin oraindik. Interesatuek 948 580 006 telefonora deitu dezakete izen-abizenak eta telefono zenbakia emateko.